ក្រសួងទុកពេលជាង២ខែ ឱ្យក្រុមហ៊ុនធ្វើពាណិជ្ជកម្មតាមប្រព័ន្ធអេឡិចត្រូនិចដាក់ពាក្យសុំអាជ្ញាប័ណ្ណ
ភ្នំពេញ៖ ក្រសួងពាណិជ្ជកម្មទុកពេលឱ្យក្រុមហ៊ុនធ្វើប្រតិបត្តិការពាណិជ្ជកម្មតាមប្រព័ន្ធអេឡិចត្រូនិចដែលមិនទាន់មានអាជ្ញាប័ណ្ណត្រូវមកសុំអាជ្ញាប័ណ្ណពីក្រសួងឲ្យបានមុន ថ្ងៃទី១ ខែធ្នូ ឆ្នាំ២០២១។
ក្នុងសេចក្ដីជូនដំណឹងចុះថ្ងៃទី១៥ ខែកញ្ញានេះ ក្រសួងពាណិជ្ជកម្ម ព្រមានថានឹងចាប់អនុវត្តន៍ការផាកពិន័យ ឬបញ្ឈប់អាជីវកម្មទៅលើ សហគ្រាសឯកបុគ្គល នីតិបុគ្គល និងសាខាក្រុមហ៊ុនបរទេស ដែលធ្វើប្រតិបត្តិការពាណិជ្ជកម្មតាមប្រព័ន្ធអេឡិចត្រូនិក ដោយ គ្មាន លិខិតអនុញ្ញាត ឬអាជ្ញាបណ្ណ ចាប់ពីថ្ងៃទី០១ ខែធ្នូ ឆ្នាំ២០២១ តទៅ។
សម្រាប់សហគ្រាស ទាំងឯកជន ឬនីតិបុគ្គល និងសាខាក្រុមហ៊ុនបរទេស ដែលចង់ដាក់ពាក្យ អាចដាក់ពាក្យបាន តាមរយៈគេហទំព័ររបស់ក្រសួងពាណិជ្ជកម្ម ដាក់ពាក្យស្នើសុំដោយផ្ទាល់នៅនាយកដ្ឋានចុះបញ្ជីពាណិជ្ជកម្ម នៃអគ្គនាយកដ្ឋានសេវាពាណិជ្ជកម្ម របស់ក្រសួងបាន៕
